பவர்ஸ்டாருக்கு ஜோடியான சந்தோஷத்தில் த்ரிஷா

பவர்ஸ்டார் என்று தலைப்பில் பார்த்ததும் நம்ம பவரு சீனிவாசன் என்று நினைத்தால் அதற்கு கம்பெனி பொறுப்பாகாது. இந்த பவர்ஸ்டார் கன்னட நடிகர் புனீத் ராஜ்குமார்.

பவன் குமார் இயக்கத்தில் பவர்ஸ்டார் புனீத் ராஜ்குமார் த்வித்வா என்கிற த்ரில்லர் படத்தில் நடிக்கிறார். அந்த படத்தில் த்ரிஷா தான் ஹீரோயினாக நடிக்கக்கூடும் என்று பேச்சு கிளம்பியது. 

இந்நிலையில் த்வித்வா படத்தின் ஹீரோயின் த்ரிஷா என்று அதிகாரப்பூர்வ அறிவிப்பு வெளியிட்டுள்ளனர். அதை பார்த்த த்ரிஷா பவர்ஸ்டாருடன் சேர்ந்து நடிப்பதில் மகிழ்ச்சி என்று ட்வீட் செய்திருக்கிறார்.

த்வித்வா படத்தின் ஃபர்ஸ்ட் லுக் போஸ்டர் ஜூலை மாதம் 1ம் தேதி வெளியிடப்பட்டது. இந்த படத்தில் புனீத் ராஜ்குமாரை வித்தியாசமாக பார்ப்பீர்கள் என்று இயக்குநர் தெரிவித்துள்ளார். 

த்வித்வா படத்தின் ஷூட்டிங் செப்டம்பர் மாதம் துவங்கவிருக்கிறது. பவர்ஸ்டாருடன் த்ரிஷா ஜோடி சேர்வது இது இரண்டாவது முறை ஆகும்.

விஜய் சேதுபதியுடன் சேர்ந்து 96 படத்தில் நடித்த பிறகு த்ரிஷாவின் கெரியர் மீண்டும் பிக்கப்பாகிவிட்டது. ஹீரோயினுக்கு முக்கியத்துவம் உள்ள கதைகளும் த்ரிஷாவை தேடி வருகிறது. தனக்கு எது பிடிக்கிறதோ அந்த கதைகளை தேர்வு செய்து நடித்து வருகிறார். இந்நிலையில் தான் த்வித்வா படத்தில் நடிக்க ஒப்புக் கொண்டிருக்கிறார்.

மணிரத்னத்தின் கனவு படமான பொன்னியின் செல்வனில் முக்கிய கதாபாத்திரத்தில் நடிக்கிறார் த்ரிஷா. அந்த படத்தின் ஷூட்டிங் தற்போது புதுச்சேரியில் நடந்து வருகிறது. 

பொன்னியின் செல்வன் படத்தில் பிரபல பாலிவுட் நடிகை ஐஸ்வர்யா ராய் பச்சன் நடிக்கிறார். இந்நிலையில் சரத்குமார் தன் மகள்கள் வரலட்சுமி, பூஜா ஆகியோரை வரவழைத்து ஐஸ்வர்யா ராயுடன் புகைப்படம் எடுக்க வைத்தார். அந்த புகைப்படங்கள் வெளியாகி வைரலானது.